Select Page

प्रात: सन्ध्यावन्दनम्‌

सङ्कल्पः

आचम्य प्राणानायम्य देशकालौ सङ्कीर्त्य
ममोपात्तदुरितक्षयद्वारा श्रीपरमेश्वरप्रीत्यर्थं
प्रातः सन्ध्यामुपासिष्ये।।

मार्जनम्

आपोहिष्ठेतितृचस्य अम्बरीषः सिन्धुद्वीपऋषिः
आपोदेवता गायत्रीच्छन्दः मार्जने विनियोगः।।
ॐ आपो॒हिष्ठा म॑यो॒भुव॑:।
ॐ ता न॑ ऊ॒र्जे द॑धातन।
ॐ म॒हे रणा᳚य॒ चक्ष॑से।।
ॐ यो व॑: शि॒वत॑मो॒रस॑:।
ॐ तस्य॑ भाजयते॒हन॑:।
ॐ उ॒श॒तीरि॑व मा॒तर॑:।।
ॐ तस्मा॒ अर᳚ङ्गमाम वः।
ॐ यस्य॒ क्षया᳚य॒ जिन्व॑थ।
ॐ आपो᳚ ज॒नय॑था च नः।।

मन्त्राचमनम्

सूर्यश्चेतिमन्त्रस्य याज्ञवल्क्य उपनिषद्ऋषिः
सूर्यमन्युमन्युपतिरात्रयोदेवताः प्रकृतिश्छन्दः
अभ्यन्तरशुद्ध्यर्थे मन्त्राचमने विनियोगः।।
ॐ सूर्यश्च मामन्युश्च मन्युपतयश्च मन्यु॑कृते॒भ्यः।
पापेभ्यो॑ रक्ष॒न्ताम्।।
यद्रात्र्या पाप॑मका॒र्षम्‌।
मनसा वाचा॑ हस्ता॒भ्याम्।
पद्भ्यां उदरे॑ण शि॒श्ना।।
रात्रि॒स्तद॑वलुम्पतु।
यकिञ्च॑ दुरि॒तं मयि॑।

इदमहं माममृ॑तयो॒नौ।
सूर्ये ज्योतिषि जुहो॑मि स्वा॒हा।।
इति जलं पीत्वा आचम्य।।

द्वितीय मार्जनम्‌

प्रणवस्य परब्रह्मऋषिः परमात्मा देवता दैवीगायत्रीच्छन्दः।
सप्तानां व्याहृतीनां परमेष्ठी प्रजापतिः प्रजापतिर्बृहती।
गायत्र्याविश्वामित्र: सविता गायत्री।।
आपोहिष्ठेति नवर्चस्य सूक्तस्य अम्बरीषः सिन्धुद्वीप आपो गायत्री।
पञ्चमी वर्धमाना सप्तमी प्रतिष्ठा अन्ते द्वे अनुष्टुभौ।।
गायत्रीशिरसः प्रजापतिर्ऋषिः ब्रह्माग्निवाय्वादित्यादेवता यजुश्छन्दः।
मार्जने विनियोगः।।
ॐ भूः ॐ भुवः ॐ स्वः ॐ महः
ॐ जनः ॐ तपः ॐ सत्यं
ॐ तत्स॑वि॒तुर्वरे᳚ण्यं॒ भर्गो᳚ दे॒वस्य॑ धीमहि।
धियो॒योन॑: प्रचो॒दया᳚त् ।।
ॐ आपो॒हिष्ठा म॑यो॒भुव॑:।
ॐ ता न॑ ऊ॒र्जे द॑धातन।
ॐ म॒हे रणा᳚य॒ चक्ष॑से।।
ॐ यो व॑: शि॒वत॑मो॒रस॑:।
ॐ तस्य॑ भाजयते॒हन॑:।
ॐ उ॒श॒तीरि॑व मा॒तर॑:।।
ॐ तस्मा॒ अर᳚ङ्गमाम वः।
ॐ यस्य॒ क्षया᳚य॒ जिन्व॑थ।
ॐ आपो᳚ ज॒नय॑था च नः।।
शं नो᳚ दे॒वीर॒भिष्ट॑य॒ आपो᳚ भवन्तु पी॒तये᳚।।
शं योर॒भिस्र॑वन्तु नः।।
ईशा᳚ना॒वार्या᳚णां॒ क्षय᳚न्तीश्चर्षणी॒नाम्।
अ॒पो या᳚चामि भेष॒जम्।।
अ॒प्सु मे॒ सोमो᳚ अब्रवीद॒न्तर्विश्वा᳚नि भेष॒जा।
अ॒ग्निं च॑ वि॒श्वश᳚म्भुवम्।।
आप॑: पृणी॒त भे᳚ष॒जं वरू᳚थं त॒न्वे॒३ मम॑।
ज्योक्च॒ सूर्यं᳚ दृ॒शे।।
इ॒दमा᳚प॒: प्रव॑हत॒ यकिञ्च॑ दुरि॒तं मयि॑।
यद्वा॒हम॑भिदु॒द्रोह॒ यद्वा᳚ शे॒प उ॒तानृ॑तम्।।
आपो᳚ अ॒द्यान्व॑चारिषं॒ रसे᳚न॒ सम॑गस्महि।
पय॑स्वानग्न॒ आग॑हि॒ तं मां॒ संसृ॑ज॒ वर्च॑सा।।
ॐ आपो॒ज्योती॒ रसो॒मृतं॒ ब्रह्म॒ भूर्भु॑वः स्व॒रोम्

अघमर्षणम्‌

ऋतं चेति तृचस्य माधुच्छन्दसोऽघमर्षण ऋषि:
भाववृत्तं देवता अनुष्टुप् छन्दः अघमर्षणे विनियोगः।।
ऋ॒तं च॑ स॒त्यं चा॒भी᳚द्धा॒त्तप॒सोऽध्य॑जायत।
ततो॒ रात्र्य॑जायत॒ तत॑: समु॒द्रो अ᳚र्ण॒वः।।
स॒मु॒द्राद᳚र्ण॒वादधि॑ संवत्स॒रो अ॑जायत।
अ॒हो॒रा॒त्राणि॑ वि॒दध॒द्विश्व॑स्य मिष॒तो व॒शी।।
सू॒र्या॒च॒न्द्र॒मसौ᳚ धा॒ता य॑थापू॒र्वम॑कल्पयत्।
दिवं᳚ च पृथि॒वीं चा॒न्तरि॑क्ष॒मथो॒ स्व॑:।।
आचम्य।।

अर्घ्यप्रदानम्

प्रणवस्य परब्रह्मऋषिः परमात्मा देवता देवीगायत्रीच्छन्दः।
गायत्र्या विश्वामित्र: सविता गायत्री अर्घ्यप्रदाने विनियोगः।।
ॐ भूर्भुव॒: स्व॑:।
ॐ तत्स॑वि॒तुर्वरे᳚ण्यं॒ भर्गो᳚ दे॒वस्य॑ धीमहि।
धियो॒योन॑: प्रचो॒दया᳚त् ।।

ब्रह्मावाप्तये प्रात: सन्ध्याङ्गभूत
श्रीसूर्याय इदमर्घ्यं समर्पयामि।। (इति त्रिः)

कालातिक्रमे प्रायश्चित्तार्थं चतुर्थम्।।
तच्च काललोपजनित प्रत्यवाय परिहारार्थं चतुर्थ अर्घ्यदानं करिष्ये।।
ॐ भूर्भुव॒: स्व॑:।
ॐ तत्स॑वि॒तुर्वरे᳚ण्यं॒ भर्गो᳚ दे॒वस्य॑ धीमहि।
धियो॒योन॑: प्रचो॒दया᳚त् ।।

ब्रह्मावाप्तये प्रात: सन्ध्याङ्गभूत श्रीसूर्याय
इदमर्घ्यं समर्पयामि।।
ॐ असावादित्यो ब्रह्म।।

आसनविधिः

पृथ्वीति मन्त्रस्य मेरुपृष्ठ ऋषिः कूर्मो देवता
सुतल छन्दः आसने विनियोगः।।
पृथ्वि त्वया धृता लोका देवि त्वं विष्णुना धृता।
त्वं च धारय मां देवि पवित्रं कुरु चासनम्।
ऊर्ध्वकेशि विरूपाक्ष मांसशोणित भक्षणे।
तिष्ठ देवि शिखाबन्धे चामुण्डे ह्यपराजिते।।
अपसर्पन्तु ते भूता ये भूता भूमिसंस्थिताः।
ये भूता विघ्नकर्तारस्ते नश्यन्तु शिवाज्ञया।
अपक्रामन्तु भूतानि पिशाचा: सर्वतो दिशम्।
सर्वेषामविरोधेन ब्रह्मकर्म समारभे।।

आवाहनम्

ओमित्येकाक्ष॑रं ब्र॒ह्म।
अग्निर्देवता ब्रह्म॑ इत्या॒र्षम्।
गायत्रं छन्दं परमात्मं॑ सरू॒पम्।
सायुज्यं वि॒नियो॒गम्।
आया॑तु वर॑दा दे॒वी॒ अ॒क्षरं॑ ब्रह्म॒ सम्मि॑तम्।
गा॒य॒त्रीं᳚ छन्द॑सां मा॒तेदं ब्र॑ह्म जु॒षस्व॑ मे।।
यदह्ना᳚त्कुरु॑ते पा॒पं॒ तदह्ना᳚त्प्रति॒मुच्य॑ते।
यद्रात्रिया᳚त्कुरुते पा॒पं॒ तद्रात्रिया᳚त्प्रति॒मुच्य॑ते।
सर्व॑व॒र्णे म॑हादे॒वि॒ स॒न्ध्यावि॑द्ये स॒रस्व॑ति।
ओजो॑ऽसि॒ सहो॑ऽसि॒ बल॑मसि॒ भ्राजो॑ऽसि दे॒वानां॒ धाम॒नामा॑सि विश्व॑मसि वि॒श्वायु॒:
सर्व॑मसि स॒र्वायुरभिभूरों गायत्रीमावा॑हया॒मि॑ सावित्रीमावा॑हया॒मि॒ सरस्वतीमावा॑हया॒मि॒
छन्दर्षीनावा॑हया॒मि॒ श्रियमावा॑हया॒मि॒।
गायत्रिया गायत्रीच्छन्दो
विश्वामित्र ऋषिः सविता देवताऽग्निर्मुखं
ब्रह्मा शिरो विष्णुर्हृदयꣳ रुद्रः शिखा पृथिवी योनिः
प्राणापानव्यानोदानसमाना सप्राणा श्वेतवर्णा सांख्यायनसगोत्रा
गायत्री चतुर्विꣳशत्यक्षरा त्रिपदा षट्कुक्षिः पञ्चशीर्षोपनयने विनियोगः।।

न्यासविधिः

ॐ तत्सवितुः अङ्गुष्ठाभ्यां नम:।।
ॐ वरेण्यं तर्जनीभ्यां नमः।।
ॐ भर्गो देवस्य मध्यमाभ्यां नमः।।
ॐ धीमहि अनामिकाभ्यां नम:।।
ॐ धियोयोन: कनिष्ठिकाभ्यां नमः।।
ॐ प्रचोदयात् करतलकरपृष्ठाभ्यां नमः।।
ॐ तत्सवितुः हृदयाय नम:।।
ॐ वरेण्यं शिरसे स्वाहा।।
ॐ भर्गो देवस्य शिखायै वषट्।।
ॐ धीमहि कवचाय हूं।।
ॐ धियोयोन: नेत्रत्रयाय वौषट्।।
ॐ प्रचोदयात् अस्त्राय फट्।।
इति दिग्बन्धः।।

ध्यानम्

मुक्ताविद्रुमहेमनीलधवलच्छायैर्मुखैस्त्रीक्षणैः
युक्तामिन्दुकलानिबद्धमुकुटां तत्त्वार्थवर्णात्मिकाम्।
गायत्रीं वरदाभयाङ्कुशकशां शुभ्रं कपालं गुणं
शङ्खं चक्रमथारविन्दयुगलं हस्तैर्वहन्तीं भजे।।

बालां बालादित्यमण्डलमध्यस्थां
रक्तवर्णां रक्ताम्बरानुलेपनस्रगाभरणां
चतुर्वक्त्रां दण्डकमण्डलु अक्षसूत्राभयाङ्क
चतुर्भुजां हंसासनारूढां ब्रह्मदैवत्यां
ऋग्वेदमुदाहरन्तीं भूर्लोकाधिष्ठात्री गायत्री नाम देवतां ध्यायामि।।

यो देवः सवितास्माकं धियो धर्मादिगोचरे।
प्रेरयेत्तस्य तद्भर्गः तद्वरेण्यमुपास्महे।।
आगच्छ वरदे देवि जपे मे सन्निधौ भव।
गायन्तं त्रायसे यस्मात् गायत्री त्वं ततः स्मृता।।

मुद्रा

सुमुखं सम्पुटं चैव विततं विस्तृतं तथा।
द्विमुखं त्रिमुखं चैव चतुः पञ्चमुखं तथा।।
षण्मुखोऽधोमुखं चैव व्यापकाञ्जलिकं तथा।
शकटं यमपाशं च ग्रन्थितं चोन्मुखोन्मुखम्।।
प्रलम्बं मुष्टिकं चैव मत्स्य: कूर्मो वराहकम्।
सिंहाक्रान्तं महाक्रान्तं मुद्गरं पल्लवं तथा।।
एता मुद्रा न जानाति गायत्री निष्फला भवेत्।
एता मुद्रास्तु कर्तव्या गायत्री सुप्रतिष्ठिता।।

गायत्री जप:

ॐ भूर्भुव॒: स्व॑:।
ॐ तत्स॑वि॒तुर्वरे᳚ण्यं॒ भर्गो᳚ दे॒वस्य॑ धीमहि।
धियो॒योन॑: प्रचो॒दया᳚त् ।।

उत्तरन्यास:

ॐ तत्सवितुः हृदयाय नम:।।
ॐ वरेण्यं शिरसे स्वाहा।।
ॐ भर्गो देवस्य शिखायै वषट्।।
ॐ धीमहि कवचाय हूं।।
ॐ धियोयोन: नेत्रत्रयाय वौषट्।।
ॐ प्रचोदयात् अस्त्राय फट्।।
इति दिग्विमोक:।।

उपस्थानम्

जातवेदसे मारीच: कश्यपो जातवेदा अग्निस्त्रिष्टुप्‌।
त्र्यम्बकं मैत्रावरुणिर्वसिष्ठो रुद्रोऽनुष्टुप्।
तच्छंयो: शंयुर्विश्वेदेवाः शक्करी।
नमोब्रह्मणे प्रजापतिर्विश्वेदेवा जगती।
उपस्थाने विनियोगः।।

ॐ जा॒तवे᳚दसे सुनवाम॒ सोम॑
मराती य॒तो निद॑हाति॒ वेद॑:।
स न॑: पर्षदति॑ दु॒र्गाणि॒ विश्वा᳚
ना॒वेव॒ सिन्धुं᳚ दुरि॒ताऽत्य॒ग्निः।।

ॐ त्र्य᳚म्बकं यजामहे सु॒गन्धिं᳚ पुष्टि॒वर्ध॑नम्।
उ॒र्वा॒रु॒कमि॑व॒ बन्ध॑नान्मृ॒त्योर्मु॑क्षीय॒ मामृता᳚त्।।

ॐ तच्छं॒योरावृ॑णीमहे
गा॒तुं य॒ज्ञाय॑ गा॒तुं य॒ज्ञप॑तये।
दैवी: स्व॒स्तिर॑स्तु न: स्व॒स्तिर्मानु॑षेभ्यः।
ऊ॒र्ध्वं जि॑गातु भेष॒जं शं नो᳚ अस्तु द्वि॒पदे॒ शं चतु॑ष्पदे।।

ॐ नमो᳚ ब्र॒ह्मणे॒ नमो᳚ अस्त्व॒ग्नये
नम॑: पृथि॒व्यै नम॒ ओष॑धीभ्यः।
नमो᳚ वा॒चे नमो᳚ वा॒चस्पत॑ये॒ नमो॒ विष्ण॑वे मह॒ते क॑रोमि।।

दिग्वन्दनम्

प्राच्यैदिशे इन्द्राय नमः।
आग्नेय्यैदिशे अग्नये नमः।
दक्षिणायैदिशे यमाय नमः।
नैर्ऋत्यैदिशे निर्ऋतये नमः।
प्रतीच्यैदिशे वरुणाय नमः।
वायव्यैदिशे वायवे नमः।।
उदीच्यैदिशे सोमाय नमः।
ईशान्यैदिशे ईश्वराय नमः।
ऊर्ध्वायैदिशे ब्रह्मणे नमः।।
अधरायैदिशे अनन्ताय नमः।

सन्ध्यायै नमः।
सावित्र्यै नमः।।
गायत्र्यै नमः।
सरस्वत्यै नमः।

या सदा सर्वभूतानि स्थावराणि चराणि च।
सायम्प्रातर्नमस्यन्ति सा मां सन्ध्याभिरक्षतु।।

उत्तमे शिखरेजाते भूम्यां पर्वतमूर्धनि।
ब्राह्मणेभ्योऽभ्यनुज्ञाता गच्छ देवि यथासुखम्।।

शान्तिपाठः

भद्रन्नइति मन्त्रस्य ऐन्द्रोविमदऋषि: अग्निर्देवता
एकपदाविराट्छन्दः शान्त्यर्थे जपे विनियोगः।।
भ॒द्रं नो॒ अपि॑ वातय॒ मनः॑ ॥
ॐ शान्ति॒: शान्ति॒: शान्ति॑:।।

अभिवादनम्

चतुस्सागरपर्यन्तं गो ब्राह्मणेभ्यः शुभं भवतु।।
अमुकप्रवरान्वित अमुकगोत्रोत्पन्न: अमुकशाखाध्यायी
अमुकशर्मा अहं भो अभिवादये।।

आकाशात् पतितं तोयं यथा गच्छति सागरम्।
सर्वदेवनमस्कारः केशवं प्रतिगच्छति।।

नमोस्त्वनन्ताय सहस्रमूर्तये
सहस्रपादाक्षि सहस्रबाहवे।
सहस्रनाम्ने पुरुषाय शाश्वते
सहस्रकोटियुगधारिणे नमः।

कर्मनिवेदनम्

यस्य स्मृत्या च नामोत्या तपःसन्ध्याक्रियादिषु।
न्यूनं सम्पूर्णतां याति सद्यो वन्दे तमच्युतम्।।

मन्त्रहीनं क्रियाहीनं भक्तिहीनं सुरेश्वर।
यत्कृतन्तु मया कर्म परिपूर्णं तदस्तु मे।।

अनेन प्रातः सन्ध्यावन्दनेन श्रीपरमेश्वरः प्रीयताम्।।
प्रीतो भवतु।।

 

महामंत्र

श्री भक्तकार्यकल्पद्रुम गुरुसार्वभौम श्रीमद्राजाधिराज योगिमहाराज त्रिभुवनानंद अद्वैत अभेद निरंजन निर्गुण निरालंब परिपूर्ण सदोदित सकलमतसस्थापित श्री सद्गुरु माणिकप्रभु महाराज की जय!

 

CONTACT US

Shri Manik Prabhu Samsthan,
Maniknagar,
Dist. Bidar,
Karnataka - 585353  (India)

E-mail: maniknagar@gmail.com 

Admin:  9448469913, 9448128389
Office: 9535119497,  9036656829
Seva Booking: 9008894889
Accommodation: 9902453075, 9731089499